(ဤပုံပြင်ကို ပြောပြသော ဒါယကာကြီးဦးရန်ပနှင့်အတူ)မိမိသည် သူငယ်ချင်းဖြစ်သူက ကထိန်ပင့်သဖြင့် ကျောက်ပန်းတောင်းမြို့နယ် တောင်ဦးရွာ တောင်ဦးကျောင်းသို့ ရောက်ရှိသွားခဲ့သည်။ ထိုရွာမှ ဒါယကာတော်များနှင့် အလွန်ပင် စကားလက်ဆုံကျခဲ့သည်။ အထူးအားဖြင့် ဒါယကာကြီးဦးရန်ပနှင့် စကားလက်ဆုံ အတော်ပင်ကျခဲ့သည်။ အကြောင်းသော်ကား မိမိသည် အင်တာနက်တွင် ဟာသပုံပြင်များရေးနေကြောင်း ဒကာကြီးဦးရန်ပသိရှိသွားသည်။ သို့ဖြစ်၍ သူကြားဖူးထားသော ပုံပြင်များကို ပြောပြနေသောကြောင့်ပေတည်း။ ကထိန်ပွဲကြီးနေက ဖြစ်သည်။ မိမိသည် ထိုဒါယကာကြီးနှင့် ဦးရန်ပနှင့် အတူထိုင်ပြီး စကားပြောနေလေသည်။ ထိုစဉ် အသက်ခြောက်ဆယ်ခန့်လောက်ရှိသော ဆရာတော်တစ်ပါးသည် ကထိန်ပွဲသို့ ကြွရောက်လာသည်။ ထိုဆရာတော်ကြွလာသည်ကို မြင်သောအခါ ဒကာကြီးဦးရန်ပသည် အောက်ပါအတိုင်း လက်ထောက်ဦးဇင်းအား လျှောက်ထားလေသည်။
"ဦးဇင်း! ခြောက်ပုလင်းကိုယ်တော်ကြွလာပြီး"။
လက်ထောက်ဦးဇင်းသည်လည်း ထိုဆရာတော်ကို နေရာများခင်းကျင်းပေးကာ စကားပြောနေလေသည်။ ထိုအခါက မိမိက
"ဒကာကြီးဦးရန်ပ! ခုနက ဒကာကြီးက ကြွလာတဲ့ အာဂန္တုကို ခြောက်ပုလင်းကိုယ်တော်လို့ ပြောလိုက်တယ်၊ အဲဒါဘာကြောင့်လဲ"။ ဟု မေးသောအခါ ဒကာကြီးက အောက်ပါအတိုင်းရှင်းပြလေသည်။
"ဦးဇင်းရေ အကြောင်းကတော့ ဒီလိုပါ၊ အဲဒီဆရာတော်က ကြီးမှ ရဟန်းဝတ်လာတယ်၊ ခုတော့ တပည့်တော်တို့ နယ်ထဲက တောကျောင်းတစ်ကျောင်းမှာ ကျောင်းထိုင်နေပါတယ်၊ ရွာထဲက ဒကာ ဒကာမတွေက သူ့ကို ကြည်ညိုကြတယ်၊ ဘာကြောင့်လဲဆို တောထဲမှာ တစ်ပါးတည်း တရားအားထုတ်နေတယ်ပေါ့၊ ကြည်ညိုမှုပေါ် အခွင့်ကောင်းယူပြီး လာသမျှ ဒကာ ဒကာမတွေကိုလဲ အလှူခံတာ ရက်ရက်စက်စက်ဘဲ၊ တခါတလေ အိမ်ကြွပြီတောင် အလှူခံတယ်၊ အလှူခံတာများလာတော့ သူဆီကို သွားတဲ့ (ဒကာတွေလန်)ထွက်ကုန်တယ်၊ အဲဒီအချိန်က စပြီ သူကို ခြောက်ပုလင်းကိုယ်တော်လို့ အမည်ပေးတော့တာပါဘဲဘုရား။"
ဤတွင် မိမိက
"ဟ ဒကာကြီးရ! ဒကာတွေလန်တာနဲ့ ခြောက်ပုလင်းကိုယ်တော်နဲ့ ဘာဆိုင်လို့လဲ ဒကာကြီးရ"ဟု ပြောသောအခါ
ဆီတစ်ဂါလန်ကို ပုလင်းနဲ့တွက်ရင် ဘယ်နှစ်ပုလင်းရှိလဲ ကိုယ်တော်"ဟု ဒကာကြီးရန်ပက မိမိကို မေးလေသည်။မိမိက
"ဒကာကြီးကလဲ ဆီတစ်ဂါလံဟာ ခြောက်ပုလင်းရှိတာပေါ့၊" ဖြေကြားလိုက်လေသည်။ ဤတွင် ဒကာကြီဦးရန်ပက
တစ်ဂါလန်ဟာ ခြောက်ပုလင်းရှိတယ်လေ။ ဒါကြောင့် အဲဒီကိုယ်တော်ကို ဒကာလန်(တစ်ဂါလံ) ခြောက်ပုလင်းကိုယ်တော်လို့ ခေါ်တာပေါ့ အရှင်ဘုရားရဲ့"ဟု ပီပြင်စွာ ရှင်းပြလေတော့သည်။ `ဤတွင်မှ မိမိသည်လည်း ထိုတောရဆရာတော်ကို ခြောက်ပုလင်းကိုယ်တော်ဟု ခေါ်ဆိုရခြင်းအကြောင်းကို သဘောပေါက်လေတော့သည်။"အော် အားကျဘို့ ကောင်းလိုက်တာ ငွေမကုန်ဘဲ ရလိုက်တဲ့ နာမည်ပါလား"
0 comments:
Post a Comment