Pages

Saturday, May 29, 2010

လွဲမှားချက်များ

ယခုတလောမြန်မာပြည်တွင် တရားဟောဓမ္မကထိက အရှင်ဇ၀န(မေတ္တာရှင်)သည် အလွန်နာမည် ကြီးနေ သည်။ မိမိ၏ ဘွဲ့အမည့်သည်လည်း အရှင်ဇ၀နဖြစ်သည်။ သို့ဖြစ်သဖြင့် အချို့သော ဒါယကာ ဒါယိကာမများ သည် အရှင်ဇ၀န(မေတ္တာရှင်)နှင့် မိမိကို အတူတူထင်နေကြသည်။ အရှင်ဇ၀န(မေတ္တာရှင်)၏ ဘုန်းရိပ်ကို မှီကာ မိမိက အရှောင်နာမည်ရနေသည်။ ထို့သို့နာမည်ရပုံကို တင်ပြပေအံ့။
မိမိ၏ ဇာတိရွာတွင် မျှားနတ်မောင်ဟု အမည်ရသော ဦးလေးဖြစ်သူ၏ ကားသည် ရွာမှ မြင်းခြံသို့ ပြေးဆွဲနေလေ သည်။ ထိုကားနောက်သို့ ညီဝမ်းကွဲတော်သူ မောင်မျိုးသိန်းသည် စပယ်ယာအဖြစ်လိုက်ပါနေလေသည်။ တစ်နေ့ သူတို့၏ ကားသည် မြင်းခြံဈေးကြီးအနီနားတွင် ရပ်ထားသည်။ ထိုစဉ် တရားတိတ်ခွေရောင်းသော ကားတစ်စီး သည် သူတို့၏ ကားအနီးအနားသို့ ရောက်လာကာ အရှင်ဇ၀န(မေတ္တာရှင်)၏ တရားတိတ်ခွေများကို အော် ရောင်းနေလေသည်။ ၀ယ်သူတို့လည်း တဖွဲဖွဲပေါ့။ထိုအော်သံကို ကြားနေရသော ညီဖြစ်သူ မောင်မျိုးသိန်းက
“အော် ဒို့ဦးဇင်းက တော်တော်ကို ပေါက်နေပြီဘဲ၊ မြို့ကြီးပေါ်ထိတောင်း စီဒီခွေတွေရောင်းနေရပြီ၊ ဒို့တောင်မ သိဘူး၊” ဒါတွင်မက ဘေးမှ ခရီးသည်များကိုလည်း
“ဦးဇ၀နဆိုတာ ကျုပ်တို့ရွာက ကျုပ်ရဲ့အကိုဦးဇင်းဘဲ၊ ဟုပြောကာ ကြွားလုံးများပင် ထုတ်လိုက်သေးသည်။ ထို့နောက်သူသည် အရှင်ဇ၀န(မေတ္တာရှင်)ကို မိမိဟု ထင်မှတ်ကာ တ၇ားတိတ်ခွေများကို တစ်ပွေ့တစ်ပိုက်ဝယ် လိုက်လေသည်။ ရွာရောက်သောအခါ ဆွေမျိုးများကို
“ရော့ ဒီမှာ ကျုပ်တို့ဦးဇင်းရဲ့ စီဒီခွေတွေ၊ မြင်းခြံမှာရောင်းနေတာ တွေ့တာနဲ့ ၀ယ်လာတာ။”ဟု ပေးလိုက်သော အခါ အနီးအနားမှ လည်လည်ဝယ်ဝယ်ရှိသူ ဒေါ်လေးဖြစ်သူက
“ပြစမ်းပါ ဒို့ဦးဇင်းရဲ့စီဒီခွေ! ဘာတွေများဟောထားလဲ နာကြည့်ရအောင်”ဟု မောင်မျိုးသိန်းထံမှ ဆွဲယူကာကြည့် လိုက်လေသည်။ ထို့သို့ကြည့်ပြီးသောအခါ ဒေါ်လေးဖြစ်သူက
“မျိုးသိန်း! ငအ၊ ဒါ ဒို့ဦးဇင်းမဟုတ်ဘူးဟဲ့၊ မေတ္တာရှင်အရှင်ဇ၀နဟဲ့၊ ကောင်လေးအလိုက်တာ၊ ကိုယ့်ဦးဇင်း ကိုယ်တောင် မခွဲတတ်ဘူး၊”ဟု ဆိုကာတိတ်ခွေကို ပြန်ပေးလိုက်လေသည်။ ဤသည်ကား ပထမအမှားဖြစ်ပေ သည်။ ဒုတိယအမှားသည်ကား အောက်ပါအတိုင်းဖြစ်ပေသည်။
မိမိတို့ ရွာ၏ အနီးအနားတွင် ကုက္ကိုစုရွာရှိလေသည်။ ထိုရွာမှ ဒါယကာတစ်ယောက်သည် ကိစ္စတစ်ခုဖြင့် မကွေး မြို့သို့ ခရီးထွက်သွားရလေသည်။ သူသည် ညခင်း(၈)နာရီလောက်တွင် မကွေးမြို့သို့ ရောက်သွားလေသည်။ သူ ရောက်သွားသောအခါ သူသွားမည့်လမ်းသည် ပိတ်ဆို့နေလေသည်။ အဘယ်ကြောင့်ဆိုသော် အရှင်ဇ၀န (မေတ္တာရှင်)၏ တရားပွဲရှိနေသဖြင့် လူများကြိတ်ကြိတ်ထိုးဖြစ်နေသောကြောင့်ပေတည်း။ ထိုအခါ သူသည် အနီးအနားရှိ လူတစ်ယောက်ကို
“ဘာပွဲရှိလို့ လူတွေကြိတ်ကြိတ်တိုးဖြစ်နေတာလဲ၊”မေးသောအခါ ထိုလူက
“ဒီနေ့အရှင်ဇ၀န(မေတ္တာရှင်)ရဲ့တရားပွဲရှိတယ်လေ၊ ဒီပရိသတ်တွေက သူ့ရဲ့တရားနာပရိသတ်တွေပေါ့၊” ဟု ဖြေကြားလိုက်လေသည်။ ထိုဖြေသံကို ကြားလိုက်ရသောအခါ ကုက္ကိုစုရွာမှ ဒါယကာက
“ဒို့ရွာနားက ရွာသာက ဦးဇင်းဇ၀နက ဒီလောက်တောင်နာမည်ကြီးနေပြီဘဲ၊ ဒို့တောင်မသိလိုက်ဘူး၊” ဟု သေချာစေ့စေ့သပ်သပ်မမေးမူ၍ ကောက်ချက်ချခဲ့လေသည်။ ထိုဒါယကာသည် ကုက္ကိုစုကို ပြန်ရောက်သောအခါ
အိမ်ကို မပြန်သေးမူ၍ သူတို့၏ ရွာမှ ရွာကျောင်းဆရာတော်ထံဝင်ကာ
“ဆရာတော်ဘုရား! ရွာသာက ဦးနီ+ဒေါ်ကြည်ခင်တို့ရဲ့သားလေးက တော်တော်ကို တော်ပါတယ်ဘုရား၊ မကွေး မြို့မှာ သူ့တရားပွဲမှာ တရားနာပရိသတ်တွေက ပွဲကြိတ်ကြိတ်တိုးလို့ဘဲဘုရား။”ဟု အားရ၀မ်းသာ လျှောက်နေ လေသည်။ ထိုအခါ ဆရာတော်က
“ဟုတ်မှလဲ လုပ်ပါ ဒကာရ! ဇ၀နနဲ့ မနေ့ကတောင် စကားပြောလိုက်ရသေးတယ်၊ မဟုတ်လောက်ပါဘူး၊ ”ဟု ဆရာတော်က ငြင်းသော်လည်း မရပေ၊ဒါယကာသည် သူလက်တွေ့မြင်လာခဲ့သည့်အတိုင်း ပြောနေသဖြင့် ဆရာတော်ကပင် အရှုံးပေးလိုက်ရလေသည်။ တစ်နေ့ ကုက္ကိုစုဆရာတော်သည် ထိုအကြောင်းကို စုံစမ်း လိုသဖြင့် မိမိထံ ရောက်လာကာ
“မောင်ဇ၀န ပြီးခဲ့တဲ့ သုံးရက်လောက်က မကွေးမှာ တရားဟောခဲ့တယ်ဆို၊ အဲဒါဟုတ်လား။”ဟု မေးလေသည်။ ထိုအခါ မိမိက
“ဘုန်းကြီးကလဲ တပည့်တော်က မကွေးမြို့ကို တရားသွားဟောရအောင် တပည့်တော်က နိုင်ငံကျော်ဓမ္မကထိ ကမှ မဟုတ်တာ၊”ဟု လျှောက်ထားလိုက်သောအခါ
“မသိပါဘူးကွာ၊ ငါရွာက ဒကာက မင်းတရားဟောနေတာကို သူဘဲ အတိအကျမြင်တဲ့ ပုံစံမျိုးနဲ့ပြောနေလို့ ငါ တောင်အရှုံးပေးလိုက်ရတယ်၊ အဲဒါဘဲ ငါ့ရွာက ဒကာတွေက ကိစ္စတစ်ခုကို သေခြာသိအောင်မလုပ်ဘဲ နမော်နမဲ့ အလွန်ပြောတာ၊ သိပါဘူးကွာ၊ ငါက မင်းကို အရှောင်အထင်ကြီးနေတာ၊”ဟု အလ္လာပ သလ္လာပ ပြောပြီး ပြန်ကြွ သွားလေသည်။ ဤသည်ကား ဒုတိယအလွဲပင်ဖြစ်ပေသည်။ ထိုသို့လူအများသည် မိမိနှင့် အရှင်ဇ၀န (မေတ္တာရှင်)ကို အလွန်ပင် လွဲနေသဖြင့်
“ဘွဲ့အမည်ကို ပြောင်းလိုက်ရင် ကောင်းမလား”ဟု သူငယ်ချင်းများကို အကြံအညံတောင်းသောအခါ သူငယ်ချင်း တစ်ပါးက
“ဦးဇ၀နရယ် ဘွဲ့လေးက ကောင်းသားနဲ့ မပြောင်းပါနဲ့၊ ဟိုက အရှင်ဇ၀န(မေတ္တာရှင်)ဆိုတော့ အရှင်ဘုရားက အရှင်ဇ၀န(ဗြဟ္မ၀ိဟာရ)လို့ပြောင်းလိုက်ပေါ့ ကိုယ်တော်ရ။”ဟု အကြံပေးလေသည်။ ထိုအခါ ဘေးမှ သူငယ်ချင်းများက တဟားဟားရယ်ကြလေသည်။ အဘယ်ကြောင့်ဆိုသော် ဗြဟ္မ၀ိဟာရအမည်ကား လူနာနှင့် လူသေများကို တင်သော ကား၏ အမည်ဖြစ်သောကြောင့်ပေတည်း။
“အော် မိမိနှင့် နာမည်ပြောင်းခြင်းကိစ္စသည်ကား မလွယ်ပါလား။”ဟု ညည်းချင်းသာ ထုတ်မိပါတော့သတည်း။

0 comments:

Post a Comment

 

Go Up အပေါ်သို့