“အရှင်ဘုရားက ဘဒ္ဒန္တဘွဲ့ရလို့လား”

အကျွန်ုပ်တို့၏ သာသနတက္ကသိုလ်ကြီးမှ နောက်ဆုံးနှစ်(စတုတ္ထနှစ်) အောင်မြင်သော စာသင်သား ရဟန်းတော်များသည် အကယ်၍ မဟာတန်းမ၀င်လျှင် တောင်တန်းဒေသများသို့ သာသနာပြုခရီး (၂) နှစ် ကြွရောက်ကြရသည်၊ ထို(၂) နှစ်ပြီးနောက်မှသာ သာသနတက္ကသီလဓမ္မာစရိယဘွဲ့ကို ဆက်ကပ်လေသည်၊ ထိုသာသနာပြုကြွရောက်သော ရဟန်းတော်များကို သာသနာရေးဌာနမှ သာသနာပြုကတ်များထုတ်ပေးသည်၊ ထိုကတ်တိုင်း၌ ရဟန်းဘွဲ့များ၏ရှေ့တွင် ဦး,အရှင်, တို့အစား ဘဒ္ဒန္တဟုအစားထို၍ သုံးထာသည်၊ ဥပမာ ဘဒ္ဒန္တခေမိန္ဒ, ဘဒ္ဒန္တဇ၀နစသည်ဖြင့် သုံးထားသည်၊ အကျွန်ုပ်သူငယ်ချင်းနှစ်ပါးသည်လည်း သာသနာပြုခရီး ထွက်ရမည်ဖြစ်သည်၊ သူတို့သည် သာသနာပြုတာဝန်ကျသည့် ဌာနကို မြစ်ကြီးနားမှ တစ်ဆင့်ကြွရောက် ကြရမည်ဖြစ်သည်၊ သို့ဖြစ်၍ သူငယ်ချင်းနှစ်ပါးတွင် ပထမတစ်ပါးသည် ရှေးစွာ မန္တလေးရုံပိုင်ကြီးထံ မိမိ၏ ဘဒ္ဒန္တဟုပါသော သာသနာပြုကတ်ဖြင့် အထက်တန်းအိပ်စင်တန်းလက်မှတ်ကို ၀ယ်ခဲ့လေသည်၊ လွယ်ကူစွာပင် ၀ယ်ယူရရှိခဲ့လေသည်၊ ထိုနောက် ပထမသူငယ်ချင်းတစ်ပါးနှင့်အတူ နောက်တစ်ပါးသည်လည်း အတူကြွ လိုသည် ဖြစ်၍ ရုံပိုင်ကြီးထံ ကတိုက်ကရိုက်ကြွသွားလေသည်၊ ရုံပိုင်ကြီးထံ ရောက်သောအခါ
မိမိ၏ ဒုတိယသူငယ်ချင်းဖြစ်သူက
“ရုံပိုင်ကြီး! မနေ့က ဦးဇင်းရဲ့သူငယ်ချင်း ဦးအာလောကဟာ အထက်တန်းအိပ်စင်လက်မှတ်ဖြတ်သွားတယ်၊ ဦးဇင်းလဲ သူနဲ့အတူ အထက်တန်းအိပ်စင်လက်မှတ်တစ်စောင် ရောင်းပေးပါ၊” ဟု ပြောကြာလေသည်၊ ထိုအခါ ရုံပိုင်ကြီးက
“အရှင်ဘုရားက ဘဒ္ဒန္တဘွဲ့ရလို့လား၊ အရှင်ဘုရားရဲ့ သူငယ်ချင်းက ဘဒ္ဒန္တအာလောကဆိုပြီ ဘဒ္ဒန္တဘွဲ့ရတယ်ဘုရား၊ တပည့်တော်တို့က ဘဒ္ဒန္တဘွဲ့ရတဲ့ ဆရာတော်များကိုသာ အထက်တန်းအိပ်စင် လက်မှတ်များကို ရောင်းပေးလေ့ရှိပါတယ်ဘုရား” ဆိုလေသည်၊ ထိုအခါ အခြေအနေကို အကဲခတ်မိသော မိမိရဲ့ ဒုတိယသူငယ်ချင်း ဦးခေမိန္ဒက
“ရုံပိုင်ကြီး! ဦးဇင်းလဲ ဒီမှာ ဘဒ္ဒန္တဘွဲ့ရပါတယ်ဗျ” ဟု သူကပ်ကို ထုတ်ပြလေသည်၊
ထိုအခါ ရုံပိုင်ကြီးသည် ကပ်ကို ကြည့်၍
“ဘဒ္ဒန္တခေမိန္ဒ” ဟု ကျယ်လောင်စွာ အော်ဖတ်၍ အောက်ပါအတိုင်းပြောကြားပြီး အထက်တန်းအိပ်စင်လက်မှတ် တစ်စောင်ကို ရောင်းလိုက်လေသည်၊
ရုံပိုင်ကြီးပြောလိုက်သည်က
”အရှင်ဘုရားလဲ ဘဒ္ဒန္တဘွဲ့ရတဲ့ ဆရာတော်တစ်ပါးပဲ၊ အထက်တန်းအိပ်စင်လက်မှတ်ရောင်းပေးရမှာပေါ့ဘုရား” ဟူ၍သာဖြစ်လေတော့သတည်း။